كلمات و اختصارات مش معروفة عن العربيات

كلمات و اختصارات مش معروفة عن العربيات
انا هتكلم عن الحاجات اللي بتسمعها و بتقولها و بتستخدمها فى انك تعرف تقارن بين العربيات او انك تقيس مدي كفاءة العربية وانت مش فاهم معناها او اهميتها او بتفيد في أيه او بتزود أيه للعربيه زى مثلا كلمة cc او liter الاتنين بمعنى واحد و هو المقاس اللي بيتقاس بيه سعة الموتور او بمعنى اصح بيتقاس سعة حجم كل اسطوانة من الداخل بالملى ليتر و بيتجمعوا مع بعض والناتج هو سعة المحرك
و ال cc ده هو السبب فى تسارع العربيه ودي أولا.

ثانيا: الحصان او الhp و ده بيتحسب بسرعة حرق الموتور للبنزين و الضغط الناتج عن الانفجار وسرعة تفريغ الاسطوانة للعادم و ده بيفرق فى قوة الجر للموتور يعنى مثلا لو هنقارن ما بين عربيتين ليهم نفس ال cc مع فرق قوة الحصان زى مثلا المتسوبيشى لنسر 1600 و الهيونداي فرنا العربيتين 1600 cc و العربيتين تقريبا نفس السرعة من غير ركاب لكن لو العربيتين بركاب سرعة الفرنا هتقل لكن اللنسر هتفضل ثابتة مع العلم ان الفرنا وزنها اقل بكتير بس النسر لم تتأثر بسب ان الحصان بتاعها اعلى من الفرنا.

ثالثا: الفرق بين السرعة و التسارع لان دي حاجة بيغلط فيها ناس كتير
السرعة هى اعلى سرعه بتقدر العربيه توصل ليها و ديه بتتأثر بالحصان اما التسارع هو اقل وقت تقدر توصل فيه العربيه لسرعة معينة بمعنى ان فى عربيه تقدر توصل لسرعة 100 كم / الساعة فى 20 ثانيه وعربية تانية ممكن توصل لسرعة الـ 100 كم /
 الساعة فى 12 ثانية بس هو ده التسارع و الحاجات اللي بتفرق فيه هى ال cc ووزن العربية و دقة النقلات.

رابعا: السلندير و ده هو الاسطوانه اللي بيمشى جواها البستم.

خامسا: البستم و اسمه الحقيقى هو بستون بمعنى مكبس و ده وظيفته انه يضغط الوقود قبل الانفجار و يطرود العادم بعد الانفجار و انشاء الله هتكلم عن طريقة عمل الموتور وتحويل الوقود و الانفجار للحركة في موضوع اخر.

سادسا: الـ v - w مثلا موتور v8 ده بيبقي شكل الموتور زي المواتير المنتشره فى مصر الفلات او إن لاين و دي بتبقى على صف واحد اما ال v بيبقة الموتور على صفين جنب بعض بمعنى ان البساتم او الاسطونات على صفين و متصلين بعمود كرنك واحد فبيعمل شكل v و ال w نفس النظام مع اختلاف نظام العمل و ده هنشرحو فموضوع خاص بالموتور انشاء الله

سابعا: هى FWD و BWD و AWD هما اختصار بيعرف اتجاه دفع العجل يعنى مثلا FWD اختصار ل front wheel drive بمعنى انها جر امامى و BWD يعنى دفع خلفى و AWD يعنى دفع كلى او رباعى او 4x4

طبعا فى حاجات تانية بتبقى فى اسم العربيه نفسو زى GT و RC وكل رمز بيبقى ليه معنى يعنى GT دي اختصار لكلمه ايطالي تعنى فى الترجمه الحرفيه سيارة المسافات الطويله بمعنى انها سيارة رياضيه و للعلم السياره الرياضيه مش الشكلها كوبيه ولا شكلها حلو لا السيارة الرياضيه بتبقة قدرتها عاليه و تكون بتصميم مميز يحافظ على ثباتها و تكون بتستحمل المشى المتواصل لعدد ساعات كتيره و لمسافات طويله و تكون سرعتها عاليه اما RC هى اختصار لكلمة race car و دي بتبقي عربيات نسبة التسارع بتاعتها عاليه جدا و يكون وزنها خفيف بس مش شرط تكون بتستحمل العمل المتواصل 

 

ناصر الصاوي


الوسوم: